如果真係有得揀，做台灣人還是英國人呢？
最近炒得最火熱既相信係英國放寬港人持BNO 居留英國既話題，對於已經成為台灣人既里奧好似又多咗個選擇咁，不過如果萬一英國真係咁慷慨比曬大家去做英國人，你又係咪真係會去呢？里奧就應該唔會啦，仲係比較鐘意做台灣人多D 😘。
當然，呢個只係里奧既個人立場，里奧嫂尋晚睇到有關BNO既新聞都忍唔住問里奧：雖然知道你鐘意台灣，但萬一真係可以帶兩個女去英國讀書，而你又有能力可以去生活，咁你又會點決定呢？
呢一下我真的停咗幾秒，猶豫咗一陣都係唔知點答佢，主要係因為唔係考慮自己咁簡單，但最後都係答『No』，最後呢個話題就成為咗里奧同太太尋晚既傾計話題。
西方國家好嗎？相信每個人既睇法都有唔同，亦唔會有一個標淮答案，但里奧自己就有咁既體驗，里奧曾經去過美國加州讀過幾年書，讀書時期冇皇管，每晚約埋班fd係UC Berkeley 飲住cappuccino做功課，做完就走去機鋪打翻幾鋪 街霸II , friday night 就例牌有party , 週未遊下車河，冬天去lake tahoe 滑下雪，夏天就海灘曬下太陽，都不知幾爽，冇錢洗就走去餐館打幾日黑市工「學生不能工作」，嗰時既里奧覺得美國先係自己響往既生活地，但讀完書又入唔到美籍就只能夠返香港，當時里奧都一個信念有朝一日，里奧一定會移民美國既。
返到香港之後誤打誤撞乜工都打下，最後唔知點樣又入咗一間做中港生意既公司，被公司派到中國西南區長駐當地，一去就咗五年，當時因工作關系對中國式既生活同做事方式都算了解，晚晚收工咪被安排食飯飲酒，識人就係最主要既工作，日復日年復年，好彩當年年輕力壯，否則可能已經中酒毒去咗極樂，時事方面最記得係法輪功事件就悶咗成個禮拜，點解？因為全中國既電視台全日都只係播法輪功既新聞，而且播足一星期。
五年真係一個唔短既日子，再返到香港之後里奧都好唔習慣，而且朋友都覺得里奧當時國產味好重，咩早上好、服務員、打車打的 嗰D詞彙出曬嚟，好唔容易再次融入香港生活，結婚生女很就感到香港赤化越嚟越重，加上自己係中國內陸長駐過，一場雨傘運動就決定帶埋家人離開香港，移民台灣。
幾年又過去，自18歲後統計一下自己係美國住咗4年，中國住咗5年，香港住咗12年，台灣住咗5年。如今四十出頭既里奧將呢四個地方比我揀多10次，我相信都係會揀台灣。
沒有一個地方是完美的，台灣都有唔少缺點，里奧從生活到政治好多事未必認同，但從來生活唔係應該係咁既咩？有時候睇到好多人分享台灣生活邊度好，咩福利正，里奧都未必好認同㗎，就簡單講過既情理法都已經覺得唔合理，但係有一樣野里奧覺得好舒服既係『自在』。
係台灣生活好自在，做生意做得好自在，交朋友亦交得好自在，呢幾年里奧多數與台灣人來往，從來都未有過咁自在既感覺，係台灣生活唔會怕治安唔好，唔會怕醫療費高，唔會被種族歧視。做生意唔會有部門嚟搞你，除非你有把柄被人檢舉，唔洗下下請部門食飯拉關系，交朋友又唔洗下下斤斤計較，唔洗打量別人用心，生活各方面都好自在。
如果係你，你又會點揀呢？
#里奧叔叔
#台灣生活
#移民台灣
#日希移民
Search